el vilain me parti adonquesqu'il i ot la voie mostree.
Espoir si fu tierce passee,
et pot estre pres de midi,
quant l'arbre et le fontainne vi.
Bien sai de l'arbre, c'est la fins,
que ce estoit li plus biax pins
qui onques sor terr creüst.
Ne cuit c'onques si fort pleüst
que d'eve i passast une gote,
einçois coloit par desor tote.
A l'arbre vi le bacin pandre,
del plus fin or qui fust a vandre
encor onques en nule foire.
De la fontainne, poez croire,
qu'ele boloit com iaue chaude.
Li perrons ert d'une esmeraude
perciee ausi com une boz,
et s'a quatre rubiz desoz,
plus flanboianz et plus vermauz
que n'est au matin li solauz,
quant il apert en orïant ;
ja, que je sache a escïant,
ne vos en mantirai de mot.
La merveille a veoir me plot
de la tanpeste et de l'orage,
don je ne me ting mie a sage ;
que volentiers m'an repantisse
tot maintenant, se je poïsse,
quant je oi le perron crosé
de l'eve au bacin arosé.
Mes trop en i verssai, ce dot ;
que lors vi le ciel si derot
que de plus de quatorze parz
me feroit es ialz li esparz ;
et les nues tot mesle mesle
gitoient pluie, noif et gresle.
Tant fu li tans pesmes et forz
que cent foiz cuidai estre morz
des foudres qu'antor moi cheoient,
et des arbres qui peceoient.
Sachiez que molt fui esmaiez,
tant que li tans fu rapaiez.
Mes Dex tost me rasegura
que li tans gaires ne dura,
et tuit li vant se reposerent ;
des que Deu plot, vanter n'oserent.
Et quant je vi l'air cler et pur,
de joie fui toz asseür ;
que joie, s'onques la conui,
fet tot oblier grant enui.
Jusque li tans fu trespassez
vi sor le pin toz amassez
oisiax, s'est qui croire le vuelle,
qu'il paroit branche ne fuelle,
que tot ne fust covert d'oisiax ;
s'an estoit li arbres plus biax ;
doucemant li oisel chantoient,
si que molt bien s'antr'acordoient ;
et divers chanz chantoit chascuns ;
c'onques ce que chantoit li uns
a l'autre chanter ne oï.
De leur joie me resjoï ;
s'escoutai tant qu'il orent fet
lor servise trestot a tret ;
que mes n'oï si bele joie
ne ja ne cuit que nus hom l'oie,
si il ne va oïr celi
qui tant me plot et abeli
que je m'an dui por fos tenir.
